BREAKING NEWS: រលំបាក់ប្លង់សេអគារផ្ទះសំណាក់កម្ពស់៦ជាន់ នៅក្រុងប៉ោយប៉ែត មន្ត្រីជំនាញសន្និដ្ឋានបឋមថា បណ្តាលមកពីសាងសង់ខ្វះលក្ខណៈបច្ចេកទេស
បន្ទាយមានជ័យ ៖ ការបាក់រលំប្លង់សេអគារផ្ទះសំណាក់កម្ពស់៦ជាន់ ស្មើ៤ល្បែង១កន្លែង កំពុងសាងសង់នៅចំណុចស្រះសួគ៌ភូមិអូរជ្រៅ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ មន្ត្រីសមត្ថកិច្ចសន្និដ្ឋានបឋមថា មូលហេតុមកពីសាងសង់ខុសបច្ចេកទេស ដោយសារជន្ទល់ទម្ររប្លង់សេវែងៗពេក ហើយយោលញ័រនៅពេលទ្ររទម្ងន់ស៊ីម៉ងត៍ធ្ងន់និងបុកពីរថយន្តក្រឡុកផង ទើបបណ្តាលអោយបាក់រលំបែបនេះ ។
លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត បានអោយដឹងថា នៅវេលាម៉ោង១០ព្រឹកថ្ងៃទី០៧ ខែសីហា ឆ្នាំ២០២១ មានហេតុការណ៍បាក់ប្លង់សេអគារកំពុងសាងសង់ស្ថិតនៅចំណុចស្រះសួគ៌ ស្ថិតភូមិអូរជ្រៅ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ មានម្ចាស់ឈ្មោះ យឹម គឹមអៀង ភេទប្រុស អាយុ៤០ឆ្នាំ ជនជាតិខ្មែរ មានទីលំនៅភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ មុខរបរអាជីវករ ។
លោកអធិការបានបន្តថា៖ អគារកំពុងសាងសង់បាក់ធ្លាក់នេះមានទទឹង ១២ម៉ែត្រ និងបណ្តោយ ១៦ម៉ែត្រ កំពុងចាក់ប្លង់សេជាន់ទី១ ។ ក្នុងនោះបណ្តាលអោយគ្រោះថ្នាក់មនុស្ស៖ ទី១ ឈ្មោះ នី ស្រីនិច អាយុ ១៩ឆ្នាំ ភេទស្រី ជនជាតិខ្មែរ ជាកម្មករសំណង់ ស្នាក់នៅភូមិអូរជ្រៅសង្កាត់ប៉ោយប៉ែត ប៉ោយប៉ែតខេត្តបន្ទាយមានជ័យ របួសបាក់ជើងខាងស្តាំ ត្រូវបានបញ្ជូនទៅសង្គ្រោះបន្ទាន់នៅគ្លីនិកអគារថ្មីភូមិអូរជ្រៅ និង២នាក់ទៀតរបួសស្រាលៗ ។
លោកវរសេនីយ៍ឯក សៅ សារឿន បានបន្តថា ៖ មូលហេតុបឋមដែលមន្ត្រីសមត្ថកិច្ចនិងអាជ្ញាធរសន្និដ្ឋាន គឺការសាងសង់នេះខុសលក្ខណៈបច្ចេកទេស ។
ជាមួយនឹងហេតុការណ៍នោះដែរ លោក ឡុង វុធ អនុប្រធានមន្ទីររៀបចំដែនដី នគរូបនីយកម្ម សំណង់និងសុរិយោដីខេត្តបន្ទាយមានជ័យ បានប្រាប់ឲ្យដឹងដែរថា៖ ករណីនេះលោកនិងមន្ត្រីបាននឹងចុះទៅដល់កើតហេតុដើម្បីពិនិត្យ និងរកមូលហេតុនៃការរលំបាក់ប្លង់សេអគារនោះ ។
លោក ឡុង វុធ បានបន្តថា៖ យោងឯកសារ សំណង់នោះមានច្បាប់អនុញ្ញាតិសាងសង់ដែលស្នើត្រឹមការិយាល័យច្រកចេញ-ចូលតែមួយនៃសាលាក្រុងប៉ោយប៉ែត ។ ចំពោះមូលហេតុនៃការរលំបាក់ប្លង់សេនោះ មន្ត្រីជំនាញបាននិងកំពុងស្រាវជ្រាវនៅឡើយ ។ ប៉ុន្តែមន្ត្រីជំនាញសន្និដ្ឋានបឋមថា មូលហេតុ អាចបណ្តាលមកពីករណីបច្ចេកទេស គឺជន្ទល់ទម្ររប្លង់សេវែងៗពេក ហើយវាយោលញ័រ នៅពេលវាទ្ររទម្ងន់ស៊ីម៉ងត៍ចាក់ប្លង់សេធ្ងន់និងបាញ់ពីរថយន្តក្រឡុកស៊ីម៉ងត៍ផង វាក៏គ្រេចទើបបណ្តាលអោយបាក់ររលំតែម្តង ។ លោកថា៖ សំណង់នេះត្រូវផ្អាកបណ្តោះអាសន្ន រង់ចាំការសម្រេចពីជំនាញនិងអាជ្ញាធរពាក់ព័ន្ធ។
លោកវរសេនីយ៍ ព្រំ ពិសិដ្ឋ អធិការរងទទួលផ្នែកព្រហ្មទណ្ឌក្រុងប៉ោយប៉ែត បានប្រាប់ថា៖ អំពីកម្មការិនីរងរបួសក្រោយពេលបញ្ជូនបន្តទៅមន្ទីរពេទ្យខេត្តមិត្តភាពកម្ពុជា-ជប៉ុន មង្គលបូរី ហើយត្រូវពិនិត្យនិងថត ឆ្លុះ ឃើញថា ជើងនាងមិនបាក់ទេគ្រាន់តែរបួសគ្រាំខ្លាំងប៉ុណ្ណោះ។ ចំពោះម្ចាស់សំណង់ និងមេក្រុមជាងក៏មិនត្រូវបានឃាត់ខ្លួនដែរ៕
ព័ត៌មានជាច្រើនទៀតសម្រាប់អ្នក
